Eldur, ís og mjúkur mosi
23, apríl 2024 - 28, apríl 2024
(sjá dagatal fyrir aðrar dagsetningar)
Opið frá: 09.00 - 17.00
Aðgangseyrir Sjá á opinberri vefsíðu
Sýningin Eldur, ís og mjúkur mosi er afrakstur samstarfs Vatnajökulsþjóðgarðs, Náttúruminjasafns Íslands, sex grunn- og leikskóla í nágrenni þjóðgarðsins auk eins á höfuðborgarsvæðinu, og breiðs hóps hönnuða og listafólks í heimabyggð skólanna.
Verkefnið miðaði að því að beisla sköpunarkraft barnanna, sem fengu þýðingarmikinn vettvang til að túlka náttúru garðsins, verndargildi hans og sögu með aðstoð hönnuða og listafólks í fremstu röð. Í gegnum listræn ferli sköpuðust dýrmætar tengingar milli barnanna og Vatnajökulsþjóðgarðs, sem auka á meðvitund framtíðarkynslóðanna um þá sameign þjóðarinnar sem þjóðgarðurinn er.
Eldur, ís og mjúkur mosi er samsýning nemenda í Egilsstaðaskóla, Grunnskóla Hornafjarðar, Grunnskólans í Hofgarði, Kirkjubæjarskóla, Reykjahlíðarskóla, Urriðaholtsskóla og Öxarfjarðarskóla.
Sýningin er hluti af Barnamenningarhátíð í Reykjavík og Hönnunarmars og stendur yfir 23. – 28. apríl í sýningarrými Náttúruminjasafns Íslands á 2. hæð Perlunnar. Í tilefni sýningarinnar mun Hanna Dís Whitehead leiða skapandi hönnunarsmiðju innblásna af sýningunni laugardaginn 27. apríl kl. 14-16.
Eftirfarandi listafólk og hönnuðir tóku þátt í verkefninu með nemendum: Brynhildur Kristinsdóttir, Eva Bjarnadóttir, Hanna Dís Whitehead, Íris Lind Sævarsdóttir, Jennifer Patricia Please, Sigríður Sunna Reynisdóttir í ÞYKJÓ, Sóley Stefánsdóttir, Una Margrét Árnadóttir og Örn Alexander Ámundason.
Verkefnið er styrkt af Barnamenningarsjóði Íslands.