Skip to main content

Jólaborgin Reykjavík


200.000 perur lýsa upp jólaborgina Reykjavík

Jólaborgin Reykjavík er að færast í glæsilegan jólabúning. Allar hefðbundnu jólaskreytingarnar eru komnar upp en það er margt nýtt sem gleður augað sem bætist við á næstu dögum. Reykjavíkurborg bætir í skreytingar og stemningu til að gleðja íbúa á tímum heimsfaraldurs. Alls lýsa upp borgina á aðventunni 20 kílómetrar af seríum og samtals 200.000 perur. Það er þriðjungs aukning frá árinu 2018 þegar perurnar voru 150.000 talsins. Til gamans má geta að bláa tréð í Fógetagarðinum er með 600 metra af seríum eða um 6.000 ljós og Oslóartréð um 450 metra eða 4.500 ljós.

Jólalegir viðburðir verða á vísum stað í miðborginni en opnaður verður jólamarkaður á Hjartatorgi, Nova-svellið verður á sínum stað á Ingólfstorgi og í framhaldi af því verður annar jólamarkaður sem teygir sig yfir í Austurstræti. Einnig má búast við ýmsum óvæntum viðburðum sem skjóta upp kollinum hér og þar.

Oslóartréð verður tendrað á Austurvelli að venju fyrsta sunnudag í aðventu. Það verður skreytt óvenju  mikið og skemmtilega að þessu sinni og mun áreiðanlega gleðja gesti og gangandi þó engin formleg tendrunarathöfn fari farm.

Ýmsar furðuverur tengjast íslensku jólahaldi sem setja svip sinn á bæinn. Jólakötturinn er kominn á sinn stað á Lækjartorgi, jólavættirnar birtast á húsveggjum í desember og ein ný er meira að segja væntanleg.

Blátt tré, ljósakúlur og jólaþak

Starfsfólk reksturs- og umhirðu hjá umhverfis- og skipulagsviði borgarinnar hefur verið önnum kafið síðustu vikur að koma upp öllum þessum fjölda jólaljósa. Á meðal nýjunga er blá lýsing á voldugu tré í Fógetagarðinum sem hefur vakið mikla athygli. „Jólaþak" verður sett á Austurstræti en þar verða seríur strengdar yfir götuna í anda gulu veifanna sem skreyttu götuna í sumar. Önnur nýjung eru ljóskúlur sem prýða Laugaveg og Hljómskálagarð.

Allt er þetta liður í að skapa jákvæða upplifun, búa til eitthvað sem kemur á óvart í umhverfinu. Með því að færa ljósaskrautið nær fólki eins og með kúlunum og jólaþakinu er lagður grunnur að betri upplifun gangandi vegfarenda og notalegri stemningu og enn fremur verður til skemmtileg leið að skautasvellinu á Ingólfstorgi.

Bætt var í skreytingarnar á Hverfisgötu í fyrra og hún verður áfram ljósaskreytt nú, Hjartatorg verður skreytt á skemmtilegan hátt og hið nýja og vinsæla Óðinstorg fer í jólabúning. Aukið verður við jólalýsingu á efsta hluta Laugavegar.

Jólalýsing í Laugardal og Elliðaárdal

Trjágöng í Laugardal verða lýst upp og einnig verða lýst upp valin undirgöng og brýr í úthverfum og ekki er ólíklegt að jólavættur skjóti líka upp kollinum í einhverju hverfi borgarinnar. Elliðaárdalur verður lýstur upp í nágrenni við Rafstöðvarveg í samvinnu við ON, sem er líka nýjung.

Víst er að það er órjúfanlegur þáttur í hefðum borgarbúa að heimsækja miðborgina fyrir jólinn og ljóst er að það verður enn meira að sjá en áður en þessi fagra jólaljósabirta er einstaklega þakklát á þessum dimmasta tíma ársins.

Allt þetta skapar síðan skemmtilegan ramma fyrir jólaverslun í miðborginni sem er formlega hafin

Oslóartréð

Tendrun jólatrésins markar upphaf jólaborgarinnar Reykjavíkur en tréð er sótt í norska lundinn í Heiðmörk. Rúm hálf öld er síðan það var kveikt á trénu í fyrsta skipti og minnir á áratuga vinasamband Reykjavíkur og Oslóarborgar.

Jólavættir

Jólavættaleiknum er ætlað að hvetja borgarbúa og aðra gesti til að njóta miðborgarinnar á aðventunni. Jafnframt því er verið að upphefja íslenska sagnahefð og tengja íbúa borgarinnar við gesti hennar í gegnum samtöl og sögur.

 

 

Jólakötturinn

Jólakötturinn er ein af best þekktu íslensku jólavættunum. Hann er gríðarstór, eins og segir í löngu kvæði Jóhannesar úr Kötlum um þessa óvætt sem er sögð leggja sér þá til munns sem ekki fá nýja flík fyrir jólin.

Skautasvell Ingólfstorgi

Novasvellið opnar laugardaginn 28. nóvember 2020. Orka Nátturunnar lýsir upp Novasvellið allan desembermánuð og er svellið einnig unnið í samstarfi við Reykjavíkurborg

 

 

Jólaþorpið í Hafnarfirði

Jólaþorpið er opið alla laugardaga og sunnudaga á aðventunni og iðar af lífi og fjöri í kringum jólin.

Jólamarkaður og jólaskógur Skógræktarfélags...

Jólamarkaðurinn að Elliðavatnsbæ í Heiðmörk er haldin ár hvert af Skógræktarfélagi Reykjavíkur. Þar er mikil og ljúf jólastemming á aðventunni og margar fjölskyldur koma hvert ár. 

Jólamarkaðurinn Hjartatorgi

Jólamarkaðurinn Hjartatorgi verður haldin frá og með 5-6 des, 12-13 des og svo frá 17- 23 desember.

Aðventan á Borgarsögusafni

Árbæjarsafn í jólabúning en engin skipulögð jóladagskrá verður í ár

Gestir eru hinsvegar hvattir til að heimsækja safnið á aðventunni og njóta þess að ganga um svæðið og kíkja inn í fallega skreytt safnhúsin og upplifa þannig jólaanda liðinna tíða