Að haldast í hendur og ganga í takt sem ein heild getur reynst flókið. Hindranir leynast víða sem flækjast fyrir og hægt er að hrasa um. Eina leiðin áfram er að takast á við þær í sameiningu, en flest er hægt að leysa ef við styðjum hvort annað og leiðumst í gegnum þá þrautabraut sem heimurinn bíður upp á.

Allir með er samsýning listaverka eftir nemendur í leikskólunum Ævintýraborg (Eggertsgötu og Nauthólsvegi), Grænuborg, Miðborg og Tjörn (Öldugötu og Tjarnargötu) á vegum Barnamenningarhátíðar 2024. Sýningin opnar á Torginu á fyrstu hæð Borgarbókasafnsins í Grófinni þriðjudaginn 23. apríl kl. 10.30 og stendur til 28. apríl.

Verkin á sýningunni urðu til út frá þema hátíðarinnar 2024 sem er lýðræði. Samvinna, vinátta, umhverfi og tungumál einkenna sýninguna en öll verkin leiða okkur á mismunandi slóðir í gegnum hugarheim þessara allra yngstu listamanna.