Ljósahjúpi Hörpu verður breytt í risastóran gagnvirkan striga. Hverjum sem er verður gert mögulegt að myndskreyta strigann með því að klessa á hann sýndarmálningu. Myndskreytingin fer þannig fram að þú opnar Paint Splatter (www.paint.is) á símanum þínum og velur þar úr litum og hvar þú vilt sletta málningu á glerhjúpinn. Áhrifin sjást strax á glerhjúpnum og lýtur sýndarmálningin þar sömu náttúrulögmálum og annar seigfljótandi vökvi þar sem hann tekur að leka hægt og rólega niður. Höfundar verksins eru þeir Halldór Eldjárn og Þórður Hans Baldursson.

Í nóvember 2015 efndu Harpa, Stúdío Ólafs Elíassonar og Höfuðborgarstofa til samkeppni um efnilegasta listaverkið sem nýtir sér ljósahjúp Hörpu. Vinningstillaga, Slettireka varð fyrir valinu og var fyrst sýnt á Vetrarhátíð í Reykjavík 2016.