Sýning |Handanheima
23, júní 2021 - 27, ágúst 2021
(sjá dagatal fyrir aðrar dagsetningar)
Opið frá: 17.00 - 19.00
Vefsíða
https://borgarbokasafn.is/vidburdir/syningar/syning-handanheima
Aðgangseyrir Sjá á opinberri vefsíðu
Sýning Margrétar Jónsdóttir, Handanheima, er sumarsýning Borgarbókasafnsins í Spönginni. Sýningin er vörðuð í innsetningu sem inniheldur persónulega muni Margrétar og hluta af heimili hennar, sem hún flytur inní í sýningarrýmið.
Margrét vinnur með upplifanir, umhverfi, tilfinningar og reynslu sem umbreytast í myndmál. Það getur haft margvíslegar skírskotanir, bæði augljósar og faldar, sem síðan þróast út í eitthvað allt annað en stóð til í upphafi. Allt fléttast einhvern vegin saman, lag ofaná lag sem mynda munstur og úr skítnum framkallast fegurðin.
Margrét er fædd í Reykjavík og hefur starfað óslitið að myndlist í rúm 50 ár. Meirihluta starfsævinnar hefur hún sinnt listkennslu, við grunnskóla, framhaldsskóla og Myndlistarskóla Kópavogs. Margrét hefur staðið fyrir vatnslitanámskeiðum í Frakklandi, hún hefur unnið við grafíska hönnun og rekið auglýsingastofu. Margrét lauk prófi frá Myndlista- og handíðaskóla Íslands, í frjálsri myndlist og grafískri hönnun. Mastersnám stundaði hún við Central Saint Martin's College of Art, síðar stundaði hún framhaldsnám við Kennaraháskóla Íslands.
Margrét hefur haldið á fimmta tug einkasýninga og tekið þátt í fjölda samsýninga hér á landi og erlendis. Hún var ein af stofnendum Gallery Suðurgötu 7, sem var mikilvæg miðstöð í þróun framlínumyndlistar á Íslandi. Hún var einnig einn af stofnendum Hagsmunafélags myndlistarmanna og SÍM. Verk eftir Margréti eru í eigu helstu listasafna landsins, hún hefur hlotið ferðastyrki og starfslaun listamanna. Margrét er meðlimur í FÍM, Íslenskri grafík, SÍM og Nýlistasafninu og hún er heiðursfélagi FÍMK.