Sumarborgin Reykjavík
Sumarborgin er að lifna við í samvinnu við listafólk og hönnuði, plötusnúða og tónlistarfólk, leikhúsfólk og sirkuslistamenn svo eitthvað sé nefnt. Tilgangurinn er að efla mannlíf og menningu og styðja þannig við fyrirtæki; verslun, veitingastaði og aðra þjónustu í miðborginni.
Hvergi á landinu er eins mikið af veitingastöðum, verslunum, menningu og annarri þjónustu á einum og sama staðnum eins og í miðborg Reykjavíkur og verður margt skemmtilegt um að vera í tengslum við verkefnið í sumar.
Yfir 60 verkefni, listafólks, rekstaraðila og viðburðahaldara fengu styrk úr viðburðapotti Sumarborginnar og búið er að skipuleggja hátt í 200 viðburði gestum miðborgarinnar að kostnaðarlausu í allt sumar. Hægt verður að dansa, ganga, hlusta á tónlist, sinna umhverfinu, fræðast og skemmta sér. Ný almenningssvæði hafa litið dagsins ljós eins og torgið við Tryggvagötu (Það er ekki komið nafn ennþá) sem efla mannlíf og félagslega sjálfbærni í miðborginni. Ný götugögn hafa birst í umhverfinu og má þar m.a. nefna rólur við Hallgrímskirkju, tollkolla í Tryggvagötu og sólstóla á Austurvelli ásamt aukinni setaðstöðu víða um miðborgina.
Rekstraraðilar eru farnir að færa sig út undir bert loft og skapa þannig aukin dvalarsvæði í miðborginni og mannlífið blómstrar.