Fimmtudaginn 20. janúar kl. 17:00 opnar sýning á verkum eftir Sigurborgu Stefánsdóttur í Borgarbókasafninu Kringlunni. Á þessari sýningu gefur að líta nokkur af nýlegum bókverkum Sigurborgar, en hún hefur fengist við bókverkagerð ásamt málverki í liðlega 30 ár. Bókverkin eru af ýmsum toga, bæði einstök verk og nokkur prentuð í fleiri eintökum. Sigurborg beitir fjölbreyttum aðferðum við bókagerðina, svo sem eins og klippitækni, teikningum, málun, útskurði og ljósmyndum. Sumar bókanna innihalda texta, sem stundum hefur pólitískar skírskotanir, en oft aðeins fagurfræðilegar eða fáránlegar.

Sigurborg nam myndlist við Skolen for Brugskunst - Danmarks designskole í Kaupmannahöfn (nú KADK) 1982-1987 og útskrifaðist frá teikni- og grafíkdeild skólans, eftir m.a eitt ár við textíldeild skólans. Hún hefur einnig tekið þátt í ýmsum námskeiðum m.a. í Bandaríkjunum, Japan og Mexíkó.
Hún starfaði um árabil sem kennari við Myndlista- og handíðaskóla Íslands og Listaháskóla Íslands en vinnur nú eingöngu að eigin myndlist, bæði málverk og bókverk. Sigurborg hefur haldið á þriðja tug einkasýninga og tekið þátt í fjölda samsýninga.

Öll velkomin!
Viðburðurinn á heimasíðu.
Viðburðurinn á Facebook.

Nánari upplýsingar veita:
Guðríður Sigurbjörsndóttir
gudridur.sigurbjornsdottir@reykjavik.is
s. 6912946
Sigurborg Stefánsdóttir
sigurborgst@hotmail.com