Á Borgarbókasafninu í Kringlunni verður boðið upp á freyðandi ljóð og léttar veitingar. Júlía Margrét Einarsdóttir sér um ljóðakaffið þar sem þrjú skáld í yngri kantinum flytja ljóð sín: Arndís Lóa Magnúsdóttir, Brynja Hjálmsdóttir og Dagur Hjartarson.

Arndís Lóa Magnúsdóttir er fædd 1994 en hún fékk nýræktarstyrk til að gefa út ljóðabókina Taugaboð á háspennulínu. Brynja Hjálmsdóttir, fædd 1992, hefur gefið út ljóðabókina Okfruman og birt ljóð í tímaritum og Dagur Hjartarson sem er fæddur 1986 hefur meðal annars gefið út ljóðabækurnar: Fjölskyldulíf á jörðinni, Því miður og Heilaskurðaðgerðin. Júlía Margrét Einarsdóttir er fædd 1987 og hefur gefið út skáldsöguna Drottningin á Júpíter og ljóðabókina Jarðarberjatungl, auk annarra skrifa.