List án landamæra myndir
  • Heim
  • List án Landamæra

List án Landamæra

List án landamæra er listahátíð sem leggur áherslu á list fatlaðs fólks. Hátíðin var fyrst haldin árið 2003 á Evrópuári fatlaðra og hefur verið haldin árlega síðan. Hátíðin sýnir öll listform og stendur fyrir samstarfi á milli listamanna. Hátíðin er eini vettvangurinn á Íslandi sem leggur alfarið áherslu á listsköpun fatlaðs listafólks og hefur skapað sér sérstöðu innan menningarlífsins á Íslandi. Æ fleiri verða meðvitaðir um gildi hátíðarinnar í samfélaginu. Með því að skapa vettvang skapast tækifæri og leiðir opnast, jafnvel inn á nýjar brautir. Með því að leiða saman ólíka hópa og einstaklinga opnast alltaf fleiri og fleiri dyr og tækifæri. Sýnileiki ólíkra einstaklinga er mikilvægur, bæði í samfélaginu og í samfélagsumræðunni. Sýnileiki hefur bein áhrif á jafnrétti á öllum sviðum.

Hátíðin hefur stuðlað að samstarfi á milli ólíkra hópa og m.a. verið í samstarfi við listasöfn, starfandi listafólk, leikhópa og tónlistarfólk. Hátíðin hefur einnig stuðlað að umræðu um ímynd fatlaðra listamanna í listum og list fatlaðra m.a. í samvinnu við Háskóla Íslands, Þjóðminjasafnið og Norræna húsið. List án landamæra leggur áherslu á að list fatlaðs listafólks sé metin til jafns innan listheimsins og list ófatlaðs listafólks.

List án landamæra hlaut Múrbrjót Þroskahjálpar árið 2009 og var tilnefnd til Hvatningaverðlauna ÖBÍ árið 2011. Árið 2012 fékk List án landamæra Mannréttindaverðlaun Reykjavíkurborgar.

SKIPULAG HÁTÍÐAR

Hátíðin er haldin á afmörkuðum tíma að hausti. Á dagskrá hátíðarinnar eru allar listgreinar.

Dagskrá hátíðarinnar er tvíþætt. Annarsvegar er um að ræða opinbera dagskrá sem skipulögð er af listrænum stjórnanda List án landamæra og hins vegar utan dagskrár viðburði. 

Listrænn stjórnandi velur viðburði og verk inná opinbera dagskrá hátíðarinnar og hefur þar listræn markmið í forgrunni. Á opinberri dagskrá hátíðarinnar er því listræn stjórnun, en allir geta skipulagt viðburði á dagskrá hátíðarinnar í svo kallaðri "off-venue" dagskrá. Opinbera dagskráin er haldin á einum og sama stað og þar eru einnig málþing, námskeið o.fl. Utan-dagskrár, eða “off-venue” sér hver og einn skipuleggjandi alfarið um fjármögnun og skipulag á sínum viðburði, en viðburðurinn er hluti af auglýstri dagskrá hátíðarinnar. 

Árlega velur hátíðin sér listamann ársins og getur hver sem er tilnefnt listamann. Listamaðurinn getur komið úr hvaða listgrein sem er og munu verk eftir listamannin fá sértakan heiðurssess það árið og verða einnig notuð í kynningarefni um hátíðina.

Smelltu hér til að heimsækja vefsíðu hátíðarinnar

#borginokkar