Grafarvogurinn markast af langri og fallegri sjávarsíðu sem umlykur hverfið að stórum hluta.
Hverfið er þekkt fyrir mikla hverfisvitund og margir íbúar líta á Grafarvog sem einskonar bæ innan borgarmarkanna. Grafarvogsbúar geta státað sig af listaverkum Hallsteins Sigurðarsonar sem eru staðsett í Hallsteinsgarði í Grafarvogi. Hverfið einkennist af mikilli nánd við náttúruna, stórbrotnu útsýni og náttúrusvæðum eins og Gufunesinu og ánni Korpu.
Grafarvogurinn skiptist í nokkur gróin íbúðarhverfi og atvinnusvæði, framtíðar-byggingarsvæði og þróunarsvæði. Núverandi íbúðarhverfi eru Hamrahverfi, Foldahverfi, Húsahverfi, Rimahverfi, Borgarhverfi, Víkurhverfi og Staðarhverfi. Í Höfðahverfi eru mikilvæg atvinnusvæði með mikla þróunarmöguleika. Einkum er að vænta breytinga í vesturhluta Höfðahverfis og við Elliðaárvog. Þar er í framtíðinni gert ráð fyrir blandaðri byggð og allt að tveimur nýjum skólahverfum. Land Keldna og Keldnaholts eru framtíðar-uppbyggingarsvæði, einkum fyrir atvinnuhúsnæði en einnig íbúðir. Hugmyndum um blandaða byggð í Gufunesi er slegið á frest þar til að skipulagstímabili loknu og er því gert ráð fyrir iðnaðar- og athafnastarfsemi í Gufunesi framan af skipulagstímabilinu. Þróunarásinn Örfirisey-Keldur liggur syðst í borgarhlutanum en þétting byggðar meðfram honum er eitt af meginmarkmiðum aðalskipulagsins.
